Embrace and Let Go

Minsan, masyado tayong nagiging sentimental at hirap tayong mag let go.

Mayroon sa atin na hindi kaya ang basta-bastang mag let go.  Mapa-tao o bagay man iyon, nahihirapan tayong iwanan sila dahil pakiramdam natin maiiwan ang kaluluwa natin sa kanila at kailanman ay magiging kulang na ang ating pagkatao.

Maliban sa kamatayan at mga gastusin, ang isa pang bagay na constant sa ating mundo ay ang pagbabago.  Kapag hindi tayo sumabay tayo, baka forever na magiging miserable ang buhay natin.  Kung hahayaan natin na palaging sasama ang ating kaluluwa at damdamin sa mga tao at bagay na napamahal na sa atin, malamang ay hindi magiging maganda ang nalalabi nating mga sandali.

Yakapin natin kung ano ang inilalaan ng tadhana para sa atin at ganoon din kung ano ang magagawa natin para sa ating sarili at mga mahal sa buhay.  Yakapin natin ang mga taong nakapalibot sa atin lalo na ang taong nagiging espesyal at bahagi na ng ating buhay.  Kapag dumating ang sandali na kailangan nating umalis, matuto tayong mag let go para hindi magiging mabigat ang ating damdamin.  Hindi ibig sabihin na kapag nag let go tayo ay makakalimutan na natin ang mga taong napamahal na sa atin.  Kailangan lang nating mag let go dahil sumasabay tayo sa agos ng buhay at ng pagbabago.  At kapag may pagkakataon tayo, puwede namang balikan ang mga taong naroon pa at hindi nakakalimot sa atin.