Pink Salmon

May mga tipo ng pagkain na maalala mo pa lang ay tulo laway ka na agad.

Minsan ay nasumpungan ko sa palengke ang belly strips ng pink salmon at dahil ilang taon na rin akong hindi nakatikim nito ay agad akong bumili ng isang pakete.  Natimbang na ang selyadong pakete ng salmon at hindi na pwede humirit ng dagdag.  Haha.

Maliban sa sinigang, ang trip kong luto para dito ay prito na half cook lang at sabay patulo ng oyster sauce para mas lumasa.  Dahil may sariling mantika ang isdang ito, hinahayaan ko na lang na kumatas ang mantika nito para maluto ito sa kanyang sariling mantika.  Kapag malapit na itong maluto ay saka ko ito papatakan ng oyster sauce para mas sumarap at hindi ko na ito nilalagyan ng asin.  At tiyak, kahit sinong makakaamoy nito ay siguradong gugutumin agad.